هذه القصيدة للشاعر ’ أكرم حسن أحمد ’
يا اللي عملت من البنات
عقد وحلق
ولعبت بيهم ف الطرق
وكتبتهم فى أجنديتك
ورسمتهم على لوح ورق
وعملت منهم " 100" حكايه
بتنحــــــــكى
وجرحتهم مليون جراح
ما بتنتهى
قلب البنات اللي انخدع
من نظرتك ..
من بسمتك ..
قلب البنات اللي انخدع
من كلمتك
وفردت ليهم قوصتك
وعملت منهم قصتك
وعملت فيها انك بطل
دمع البنات..
ليه بيبسطك ؟
هما البنات زى السمك
غشك خداعك ليه شبك ؟
قلب البنات اللي أنشبك بمحبتك
وغدرت بيه.
إيه حكمتك ..
ياللي عملت من البنات
عقد وحلق
ولعبت بيهم ف الطرق
حلم البنات اللي انهدم
قلب البنات اللي انقسم
جرح وألم..
حزن وندم
قلب البنات اللي انظلم
كان جوه منه أنت الأمل
كان جوه منه و جنته
يلمح عيونك تبتسم
وف النهاية بينجرح
ويكون دموعه سنين ثمن ... !
يا اللي عملت من البنات
عقد وحلق
ولعبت بيهم ف الطرق
قلب البنات لو يوم حكى
هتوه عيونك م البكى
جوه البنات دبله وفرح
جوه البنات بستان مرح
بس اختفى من جرحنا
حلم البنات مش حلمنا
اصل البنات مش زينا
البنت مش زى الولد
البنت حس بيتولد ..
إن مات بيرجع يتولد
البنت زى اللؤلؤه
بركان تقى لو تفهمه .!
يا اللي عملت من البنات
عقد وحلق
ولعبت بيهم ف الطرق
خد البنات اللي إترسم
فوق منه شطين م البكى
و اداروا باللون والألم
خد البنات اللي ابتسم
مش بسمته
قلب البنات اللي ابتسم
جواه بيكتم دمعته ..!
يا اللي عملت من البنات
عقد وحلق
ولعبت بيهم ف الطرق
قلب البنات اللي انكوى
من نار هوى
شوف رقته
حتى الهوا بيجرحه ..!
يا اللي عملت من البنات
عقد وحلق
ولعبت بيهم ف الطرق
قلب البنات اللى انجرح
لو يوم فرح
تلقى الشوارع تبتسم
تلقى الحياه ياسمين طرح
يا اللي عملت من البنات
عقد وحلق
ولعبت بيهم ف الطرق
وكتبتهم فى أجنديتك
ورسمتهم على لوح ورق
دمع البنات ليه بيسطك
دمع
البنات
ليه
بيبسطك
