المتحولين ... قصة طريفة

انا هاحكي قصة طريفة
واحد رايح للعروسة ولابس الحتة اللي على الحبل وعامل الحبل حزام وملمع الشوز وكاوي البنطلون تحت المرتبة
ومزحلق شعره بفازلين وعازم اصحابه واهله وناسه ورايحين للخطوبه سوا
وفي الجانب الاخر العروسة والكوافير والمناكير والبداكير والكهرباء والفولتات والاهل والحبايب والجيران
ودقت ساعة البداية
وصفر الحكم
توييييييييييييييييييييييييييت
وسنتر اهل العريس ورنوا الجرس
ترن ترن
ووفتح ابو العروسة الباب وعلشان يسبك العمليه قالهم نعم اهلا
مرحبا
اتفضلوا
ولما حس انهم كتير قال بصوت ناعم معاكم حد( ركزوا المتحولون اشخاص لايظهر عليهم اي اعراض خارجية ظاهرة)
رد العريس ازيك يا عمي عامل ايه، لا ابدا دول اخواتي وكام واحد صاحبي كده علشان نفرح شوية

ودخلوا ليجدوا ان البيت كومبليت
ودخل الاصدقاء وهيصة ودوشة وكان اليوم ماتش النهائي على دفتر المأذون

المهم قعد العريس وابوه وعمه وكام واحد يجوا تلاتشر خمساشر واحد مع اهل العروسة والمكون من ابو العروسة في الهجوم وعمها واخوها خط وسط ، وباقي العائلة في النصف ملعبهم وخالها باين انه هو الجوين اللي هايشيل كل الكور من بين التلات خشبات

ركزوا معايا
كلهم مبتسمين
هههههههههههههههه

وفجاة العريس قال امال فين العروسة
ابوها راح ضارب بوز
وقاله جايه بس نقرا الفاتحه وراح مكشم له ( بداية التحولات)
اهل العروسة قالوا في نفسيتهم ايه العريس قليل الادب ده
وراحوا عاملين كوبي وبسط لتكشيمة ابوة العروسة ( تحول جماعي)

ابو العريس حب يعدل الامور ويجب الكورة في ملعبه راح قايل بصوت عالى
احنا هانعمل اللي ينطلب مننا وزيادة انت اهل كرم وعائلة تتناسب وبيتقال في حقكم احسن كلام ( تحول انسيابي)

اهل العروسة كلهم عملوا تحول جماعي تاني وابتسموا في لحظة واحدة

وبدأوا يتكلموا عادي
قال ابو العروسة احنا بنشتري راجل
المهم يحافظ على بنتنا وطبعا هو مش هيلاقي احسن من بنتي دي تربيتي
المهم احنا عاوزين شبكة زي الناس

ابو العريس وعمه في نفس واحد قالوا اللي تطلبوه في حدود المعقول من عنينا

اهل العريس منشكحين معاهم اتنين متكلمين بقى

ابو العروسة بص لعمها وخالها
خالها قال والله يا جماعه دي كلها شكليات ( ابو العروسة بوز له وكأنه بيقوله اسكت)
عمها قال انابنتي جالها بتلاتين الف جنيه دهب شبكة ( ابو العروسة من بعيد يقول في سره ايوة كده يا اخويا ارفع معنوياتي)
عمها يكمل ويقول وفرح بنتي كان في فندق كذا ودفعنا كذا وعملنا كذا وبيهاجم بكل قوة

اهل العريس حصلهم زي حالة توقف مفاجيء عن سير العمل وزي ماتقول كده الرامات عندهم بطيئة والبروسيسور تعبان
بيهزوا راسهم وبس جماعي

المهم خلص عمها وهجماته كلها رايحه على الجون والشوط من خارج الصندوق الاخضر

ابو العريس كابتن الفريق والدفاع ومساعد الجون اللي هو عمها
رد ابو العريس مدافعا اللي فيه الخير يقدمه ربنا ( وطلع كل الكور بره في الاوت)

المهم بصوا لبعض وقالوا نقرأ الفاتحة وربنا يقدم لنا اللي فيه الخير اتفقنا اننا ان شاء الله هانريح بعض ونعدي الجوازة دي على خير

وقفوا جميعا يقرأون الفاتحة

وانتهوا
وجه وقت العروسة
تن تتنتن تنن تنت ن
الشربات يا بنات

للووولللولللليييييييي

دوشة
اصحاب العريس تحولوا فجأة الى فرقة من بتوع قصائد المدح في الحمير بحبك يا حمار والكلام الحلو اللطيف ده
واهل العروسة تحولوا الى فرقة من الغوازي والرقص الشرقي الممتع والغازية لازم ترقص ( قديما في افلام زمان كانت الغازية لازم تنزل انمامع التطور الحديث تبقى لازم ترقص وتهيص مع الجماهير)

تحول مفاجي هيستيريا هطل وهبل وعبط

العروسة وصلت
طا طا طاط تن
ان ان ااااان
موسيقى تصويرية
الصدمة للاب اولا

والعم بعد منه

واهل لعريس كلهم في صدمة

ينهار ابيض
دي العروسة

مش ممكن

دي حتة قشطة
يا بختك يا ابن المحظوظة

ابو العريس جرى على العروسة وقعد يقولها ازيك يا عروسة ابني
عاملة ايه يا عروسة ابني

وعم العريس شرح ابوه

واهل العريس كلهم بصوت عالى
ازيك يا عروسة

وبعدين جه ميعاد الدبلة والخاتم وكلمتين حلوين

العريس واهله مبسوطين اوي وبيلعبوا في نص ملعب اهل العروسة ومتمكنين من نفسهم والثقة زيادة اوي
والعريس ضرب ايديه في جيبه وطلع العلبة وفيها العدة بتاعة الشغل
خاتم ودبلتين
اهل العروسة بصوا للعلبة شكلها مميز
قديمة شوية
وزي ما تقول عليها اثار انها مستخدمه قبل كده

عم العريس ميل على ابو العريس وقاله
انا مش قولت لك غير العلبة مدام مش هاتغير الدهب
انت ايه عاوز تخرب على الولد
دي العروسة السابعة في شهر
ايه عاوزة يقعد طول العمر جنبك

ابو العريس قاله يا سيدي ده اهل العروسة باين عليهم هبل ومش عارفين حاجه

عم العريس قاله يعني مش شايف نظراتهم

اهل العروسة من بعيد يحاولوا يسيطروا على الموقف ويقوم ابو العروسه ويمسك الدبلة من ايد العريس
وفي نفس الوقت يدخلن صديقات العروسة ويحملن الشربات والمثلجات والذي منه

ابو العروسة يمسك الدبلة كويس يبص يلاقي مكتوب عليها اسم وتاريخ
يقوم يبص للعريس بصة غيظ ويقول كلام تانتسانسنءؤىنءةىؤزئوءةىؤزوةئءؤىزو ( وهو فعلا كلام مكنش مفهوم وقتها )

المهم العريس قاله مالك بس يا عمي
قاله يعني مش عارف
العريس قال لأ فيه ايه بس

ابو العروسة اتنرفز اوي وراح لافف وماسك زجاجة بيبس من على الصينية وراح رافعها في ايديه لفوق والدبلة في ايديه التانية

طبع الموقف صعب والعريس خلاص

مش مركز
وبدأت اعصاب العريس تنساب
وتنحل
العريس
بقى عاوز سباك يلحق الميه اللي نازلة من اول شعر راسه لغاية شرابه

كل ده وابو العروسة ماسك الدبلة في ايد والزجاجة في ايديه التانيه

والناس كلها سكتت وابو العروسة هايستعد

من بعيد ابو العريس مع عمه
عمه يقول مش قولتلك انت هاتخرب على ابنك اهو الراجل كشف الموضوع وهايعرف ان الدبلة والخاتم .....................

وراح ابو العروسة قايل

يا دبلة الخطوبة عقبالنا كلنا يلا غنوها

هيييييييييييييييييييييييييييييييييه

طبعا الكل فرح وبعد سكوت للحظة وتحول من هيصة وزمبليطة الى سكوت لحظي

ليعود الامر كما كان وهيصة كبيرة
والصوت اعلى

والناس كلها اتحولت وكله قام يجامل واللي مش بيعرف يرقص بقى يحزم اللي بيرقصوا
والتحول عم على الجميع

والكل تعب من المجهود

وطبعا
جه الوقت وصفر الحكم بانتهاء الوقت الاصلي للمبارة والنتيجة واحد واحد

وخرج الفريقين من ارض الملعب وبقى اللاعبين اللي هايلعبوا ضربات الجزاء
ابو العروسة وعمها والعروسة وامها واختها
ابو العريس والعريس و عمه وخاله واخته وامه

نسيت اقول خال العروسة مع ان هو الحضري بتاع الفرقة

المهم بدأت الضربات ومع اهل العريس اولا
وشاط ابو العريس وقال انا كنت عاوز اتكلم معاك يا عريس بنتي شوية مع بعضنا بكرة
والعريس يقول اللي تشوفه يا عمي ( جون كده)

ابو العريس واخت العريس يقولوا للعروسة انتي بكره هاتيجي عندنا وتعيشي معانا وهاتشوفي نظامنا وهايعجبك اوي

والعروسة تصد بنفسها وتقول انا بحب اعيش على حسب الوضع الي بفكر فيه مع تيييييييييت ( اسم العريس بس الرقابة علشان تشابه الاسماء)
طبعا طلعت بره

وفضل اهل العريس يرموا كلمة واهل العروسة يرموا كلمة لغاية ما وصلوا للنهاية
الكلمة المصيرية اللي هاتحدد كل شيء

ابو العروسة يعني انت مش عاوز تجيب المطرب اللي بيغني بحبك يا حمار في الفرح
ولا المطربة اللي بتغني للحصان

العريس يا عمي المطربين كتير وممكن نجيب المرب اللي بيغني للبانجو والحشيش واهه هايعجب الناس

العروسة تقول والراقصة انا عاوزة الرقاصة اللي كانت عاملة فيلم مع الفنان الفلاني
العريس يقول ايه بس يا جماعه
ابو العريس يا جماعة هو المشكلة في المغنيين والراقصة ولا اننا نعمل الضروريات

ابو العروسة مش كفاية قبلناكم بدبلكتم القديمة وابن اللي مكروش من سبع بيوت
انت فاكر ايه اننا نايمين( تحول مفترس وهجومي)

ابو العريس يلا بينا ياض يا تييييييييييت ( اسم العريس ) الجوازة دي مش نافعة

اهل العريس كلهم كشموا بنفس البرنامج بتاع التكشيم
وراحوا قالبين حوجبهم
المههم
اهل العروسة قالوا احنا هانسكت لهم ولا ايه
راحوا قالبين حوجبهم هما كمان

ابو العروسة قالهم طيب اتفضلوا ونحل الموضوع بكره

ابو العريس قال لا بكره ولا بعده
احنا مشيين
هاتوا حاجتنا
والجاتوه والبيبس عندنا حسابه

ابو العروسة قاله لا يابابا هو دخلو الحمام زي خروجه
البنت تلزمكم
خلاص قضي الامر

ههههههه
العريس شك انه اتدبس وكأنه اشترى قميص من بياع نصاب ومش عارف يخلص منه

المهم العريس خاف وقلق
راح مادد ايديه وشاددابو العروسة بغباء وقاله هات الحاجة بتاعتي

راح عم العروسة هبده بالزجاجة في راسة
وقع العريس
والدنيا هاجت وماجت
وقامت وقعدت
المهم

بعد التحولات دي كلها
انتهى الامر كأن لم يكن

العريس خد احداشر غرزه والعروسة اتعورت من بوكس تحت عينها
وابو العروسة اتخربش في رقبته
اما عمها فطلع ناصح محدش عرف يطوله
انا اصاحب العريس فكل واحد منهم هجم على بنت من اللي كانوا هناك وقعد يشد فيها بحجة انه زعلا ن على صاحبة

طبعا الموضوع خلص
واتجوزوا وعاشوا في تبات ونبات خلفوا صبيان وبنات

معلش ياجماعة لو كانت رزلة شوية اصلها من تأليفي المرة دي
ويا رب تنول اعجابكم بحق و حقيق

ي

ده لو تاليفك يبقى روعه فعلا يا انجل

بجد فنانه
ههههههههههههههههههههه

شكرا مداح على مرورك
والف شكر على تعليقك الجميل ده
ويا عم ولا فنانة ولا حاجة دي كانت مجرد مرة كده وخلاص
يعني فكرة وراحت لحالها ومش هتتكرر تاني
وشكرا ليك مرة تانية

هاهاهاهاهاهاهاهاها أ،نا قلت خلاص الجوازة هتتفشكل وفجأة لاقيته اتجوزوا وخلفوا كمان
هاهاهاهاهاهاهاهاهاهاها
بجد والله فعلا تحفة وروعة وجامدة و بتضحك
دماغك عالية اوي يا انجل

شكرا على مرورك وكلامك الحلو ده يا هاجر
الف شكر يا قمر

ايه الجمال ده يا انجل بجد روعه وتسلم ايدك يا رب

شكرا يا وزير عالمرور

ليه مش تتكرر تانى مش يمكن فى مره اشترى كتاب الاقى اسمك عليه

ههههههههههههههههههههه

ماشي يا مداح انت تؤمر
واول ما انزل الكتاب هيكون عندك نسخة ومكتوب عليها اهداء مني كمان
واكيد مش انت لوحدك يعني دا لكل اللي في المنتدى
بس اكيد مش كتاب واحد يعني لكل واحد منكم كتاب
ان شاء الله
دا لو حصل في يوم من الايام
وانا اول من يشك بهذا الامر بصراحة