وتر السكوت هيموت
لو جبت يوم العود
وعزفت كام جملة
وطنك نشيد مولود
فوق الشفاه هيموت
لو بعته بالجملة
اطلع سلالم دو
واصرخ واقول ياهووووووه
عصفور كنارية زهق
لملم خيوط عشه
لا حد بيكلمه ولا حد بيهشه
قال الفروع بتميل
والجذر ليه خوخ
وطريقكوا صعب طويل
مشاويره بتدوخ
عطش السنين مبدور
على سكة مقلوبة
والشيب سرح فى الغيط
والضحكة مصلوبة
فوق الملامح ليل
ملهوش نهار يطلع
ولا زقزقة عصافير
ولا طلع عاد يطرح
يا مولودين عواجيز
وعيونكوا معصوبة
اتحطوا فى البراويز
وامشوا فى زمان طوبة
ده الحال فى يوم ما يميل
ما بتسندوش طوبة
ارضى الشراقى تقول
كلنى العفن والبور
وديابة حراسى
والسقايين رحال
متسلسلين بحبال
وموطيين راسى
دور سواقى الشوف
وناولنى فاس وشادوف
اوصل لباطنها
ده الحر لما يشوف
ويبان له على المكشوف
حيصون حفان طينها
انا وانت كنا اتنين
والحلم تالتنا
جالنا غراب البين
عشش قصاد بيتنا
يا صيادين الشوم
شباكوا ليه دابت
متسندين ع الحيط
وركبكوا ليه سابت
اسد الخلا معروف
بالطهر والذمة
لو مات فى يوم م الجوع
ما يطاطى ع الرمة
يا مفطومين ع البكا
ضى الزمان بادى
تبت فى جذع النور
يطرح نهار نادى
ضى الشموس حيدور
ومشيره يوصلك
اوع الشموس لتغيب
ويموت ف يوم ضلك
كلمنجى انا يا ناس
وكلمتى زادى
لا حعدل اللى مال
ولا كنت يوم قاضى
قلمى الرصاص مكسور
والحبر كان فاضى
يجعل كلامى سلام
مربوط ف رجل حمام
للى فهم معناه
ورصاص برود او شوم
ع الغرقانين ف النوم
واللى كلامى اذاه
للشاعرة والصحفية: ايمان بكرى
